24sedum.net

24 седум вести портал

НИ СЕ ЗАКАНУВА ИНВАЗИЈА НА ВОНЗЕМЈАНИ, НО НЕ КАКВИ ШТО ОЧЕКУВАМЕ

Постојаниот развој во истражувањето на вселената и вклучувањето на нови, приватни компании во тоа истражување, претставува ризик за Земјата од инвазијата на вонземјани, но не какви што очекуваме и си замислуваме, предупредуваат научниците. Тие наведуваат дека заканата е всушност инвазија на непознати вируси и бактерии од вселената.

Пандемијата на коронавирусот предизвика загриженост кај научниците за епидемиолошката безбедност, а некои дури и изнесоа теории за вонземското потекло на вирусот што нè погоди.

Научниците одамна знаат дека одредени микроорганизми, како што се полиовируси или бактериофаги, можат да го преживеат вакуумот во вселената и космичкото јонизирачко зрачење.

Затоа научниците во новата студија, објавена во научното списание Bioscience, предупредуваат на опасноста од вселенските микобактерии и вируси.

Опасноста од вонземски вируси не ни се заканува само нам, туку и на небесните тела до кои луѓето допираат носејќи вируси од Земјата, предупредуваат научниците, а опасноста е поголема отколку што досега се мислеше.

„Речиси е невозможно да се истражат нови планети без микробиолошки пренос“, се вели во научната студија.

Научниците објаснуваат дека некои организми имаат развиена толеранција за условите во вселената, а некои дури можат да растат и еволуираат во одредени вселенски услови, како што е микрогравитацијата.

Тие се осврнаа и на нашиот најблизок планетарен сосед Марс, кој е предмет на зголемен интерес на вселенските истражувачи.

„Новите докази сугерираат дека одредени региони под површината на Марс може да поддржат висока густина на микробните клетки. Тие региони на Марс, но и на други планети и небесни тела, кои се сметаат за потенцијално погодни за живот, веројатно ќе бидат цел на мисиите во потрага по вонземски живот, со што ќе се зголеми ризикот од контаминација во два правца“, се наведува во студијата.

Научниците ја повикуваат меѓународната заедница да развие системи за препознавање на ваквите закани и можните последици.

Извор: Sputniknews.com