Шилегов: Сkoпје го добива најдобриот забавен парк во регионот

Шилегов: Скопје го добива најдобриот забавен парк во регионот

А како ќе изгледа? Погледнете во продолжение

Градоначалникот на Град Скопје, Петре Шилегов, на денешната прес-конференција го претстави проектот за новиот забавен парк во Скопје, чијашто изградба беше одложена со консензуална одлука на Советот на Град Скопје на почетокот на светската пандемија на Ковид-19 вирусот.

– Во Април 2020-та, сите советници во Советот на Град Скопје, консензуално донесоа одлука да ја одложат изградбата на Луна Парк и парите на даночните обврзници да бидат пренаменети за некои други кризни, пандемски проекти и трошоци.

Тоа е еден од ретките примери кога советниците во градот успевале да донесат правилна и издржана одлука, необременета со популизам и печалење на политички поени, изјави градоначалникот Шилегов.

Денес, година ипол по оваа одлука и со пандемија на којашто и се наѕира крајот, сметам дека е време да го вратиме забавниот парк на агендата на градот и да започнеме со градба кон крајот на оваа година. За забавниот парк Градот има обезбедено проект, обезбеден буџет, соодветен план за јавни набавки и обезбедена локација за градба, додаде тој.

– Скопје треба да стане регионален туристички центар. Стотици туристи секој викенд со автобуси доаѓаат од соседни држави за да ги посетат нашите детски атракции како Скопската Зоолошка или Дино Паркот.

Дино паркот е единствен во регионот, а зоолошката една од подобрите во него. Со забавниот парк Скопје станува дополнително попривлечен за семејниот туризам, со оглед на тоа што ваков забавен парк нема во радиус од 300 км од Скопје, нагласи Шилегов.

Креираме нови работни места, ја помагаме локалната економија. Проектот е целосно самоодржлив, за реализација на овој проект се бара изведувач кој ќе го финансира и нема да има буџетски импликации на град Скопје. Се очекува паркот да се исплати сам за три години, а потоа градот ќе заработува и ќе вложува во нови проекти. Создаваме одржлива градска организација, нагласи Шилегов

– Скопјани добиваат најдобар парк во регионот за нула денари, Скопјани го добиваат најдоброто. Скопје е град за сите. Инвестираме и во благосостојбата на возрасните, и во онаа на младите, а сега ви ги претставувам нашите инвестиции за нашите најмили – децата. Јас не ветувам брзи и лесни проекти, туку стратешки проекти кои го решаваат Скопје за следните 50 години, порача градоначалникот Шилегов на крајот од денешната прес-конференција.