Утврдена причината за пожарот во модуларната болница во Тетово

Од Обвинителството посочуваат дека ова вештачење е само еден од досега обезбедените докази, со кои се утврдува дека пожарот настанал како последица од електрична куса врска преку висок преоден отпор во приклучниот кабел на дефибрилатор, со кој се реанимирал пациент
Куса врска на прегреан кабел на дефибрилатор е причина за пожарот во модуларната болница во Тетово, според вештачењето на МВР, за што е доставен извештај во тетовското обвинителство.

Како што соопштија од државното јавно обвинителство (ЈОРСМ), во Основното јавно обвинителство-Тетово е доставен извештајот од извршено вештачење на траги од пожарот во модуларната ковид-болница, изработен од Одделот за криминалистичко-технички испитувања и вештачења при Министерството за внатрешни работи.

Согласно издадената наредба од Основното јавно обвинителство-Тетово, вештачењето утврдува постоење траги од електрична куса врска на доставениот материјал подигнат при увидот на самото место на пожарот, како и траги што се значајни за утврдување на причината поради која настанал пожарот во модуларната болница, во кој животот го загубија 14 лица, информираат од ЈОРСМ.

„Со вештачењето се утврдува дека пожарот настанал како последица од електрична куса врска преку висок преоден отпор во приклучниот кабел на дефибрилатор, со кој се вршела реанимација на пациент во една од болничките соби. Прегревањето на кабелот предизвикало палење во приклучната кутија од продолжителниот кабел на кој бил приклучен дефибрилаторот, полнач за мобилен телефон и уште еден апарат“,

посочуваат од обвинителство.
По воочена појава на пламен, потенцираат од ЈОРСМ, присутниот медицински персонал се обидел да го изгасне пожарот, но тој почнал бурно да се шири по целиот објект, простирајќи се по кровните панели кон ниските предели на панелните ѕидови и болничкиот инвентар.

„Со оглед на тоа што сите хоспитализирани пациенти биле приклучени на централниот довод за кислородна поддршка, а со тоа и процентуалното присуство на кислород во целиот болнички простор било зголемено, како и поради настанато оштетување на кислородната инсталација во текот на пожарот, огнот се проширил по целиот објект за многу краток временски период. Кон ова придонел и фактот што во поткровниот простор на објектот не постојат прегради помеѓу модулите/просториите и кон ходникот кои би го забавиле пренесувањето на огнот“,
велат оттаму.

Од ЈОРСМ посочуваат дека ова вештачење е само еден од досега обезбедените докази и најавуваат дека се очекува во Основното јавно обвинителство-Тетово да пристигнат извештаите и податоците за кои Обвинителството има издадено наредби и насоки и до други надлежни институции, како и вештачењето што треба да пристигне согласно побараната меѓународна правна помош од експертски тим од Германија. Велат дека Обвинителството и натаму интензивно постапува по предметот и се преземаат и други дејствија за целосно расчистување на настанот.

По прибирање на сите вербални и материјални докази, по нивно разгледување и анализа, ќе биде донесена јавнообвинителска одлука за натамошниот тек на постапката, информираат од ЈОРСМ.